DALAN NGGRONJAL (sambungane udan politik)

Dalan Nggronjal

(sambungane Udan Politik)

Dening; Mbah Atmo Kulonkali

Nanging wis dadi ora penting, sik penting aku wis bisa ngukur wawasane nyepeda motor. Okeh tunggale yen jan-jane ora lulus ujian SIM nanging padha nggawa motor neng ndalan biayakan, nunjang palang sak karepe dewe. Ora ana bedane karo sak perangan pejabat politis lan uga pejabat karier sik wis kebacut njabat ning lali urung diuji, opo meneh lulus uji kompetensi.

      Hawa tambah sore tambah adem, lan sak wise tanjakan, dalane nuli rata, wis ora tak gagas Vario 125 mau. Lakune hondaku rada tak alonke, santai, sak liyane merga hawa adem uga sinambi enggar-enggar manah. Lan aku ngerti yen dalan ngarepe iki bakal okeh kang bolong. Kepara bolonge ana sik rada jeru. Amarga udan rendeng kepungkur gawe keli tembelane kaspal. Langit isih katon peteng. Nggambarake kahanan kang kebak tatune ati para kompetitor Pilkada kalah biting. Apa meneh nggrantese para tim sukses sik ora sukses, tansah gronjal-gronjal kahanan atine kaya dalan sik tak liwati iki. Ora mung merga kalah jagone, nanging mikir kepiye etungane amplop sik wis kebacut disebar. Muga ora bakal suwe anggone mari seka tatune, lan muga enggal kesaur utange.

       Dalan kaspal iki dalan kang ora patio rame, nanging wayah sore mengkene isih akeh sik pada ngliwati. War wer nyalipa kiwa tengen ora tak gape. Ben wae. Sak karepmu. Kabeh katon ora sabar. Selak kepingin tekan tujuane dewe-dewe. Ora beda karo kahanan sak nyatane. Yaiku ana sik selak kepingin sugih, selak kepingin kuwasa, selak kepingin mulya, selak kepingin dadi pejabat, lan selak liya liyane. Sik paling akhir yaiku selak kepingin ngerti hasile Pilkada. Mulane ana istilah quick count. Amarga selak ora sranta ngenteni real count. Tumrapku babar blas ora kesengsem marang real count apa meneh quick count, aku mung nganti-anti anane discount. (mo)